Bydd cyfle i bobl ymuno â thaith lenyddol arbennig o Amgueddfa Llanberis i gartref brenhines ein llên, Kate Roberts yn Rhosgadfan. Mae’r daith wedi ei drefnu gan Llenyddiaeth Gwynedd ddydd Sadwrn, 12 Mai.
Bydd y daith yn dechrau am 11am yn Amgueddfa Llanberis lle fydd cyfle i edrych o gwmpas yr amgueddfa a chael blas ar hanes a threftadaeth yr ardal. Bydd cyfle i brynu cinio yn y caffi neu fwyta eich brechdanau eich hunain cyn dal y bws am Cae’r Gors (cartref Kate Roberts) yn Rhosgadfan am 1.00pm.
Cewch gyfle i glywed sgwrs ddifyr gan y darlithydd Jerry Hunter am fywyd a gwaith Kate Roberts ac os fydd hi’n ddiwrnod braf bydd hefyd taith gerdded fechan i Lôn Wen, felly dewch a sgidiau addas.
Bydd te a chacen am ddim a bydd y bws yn cyrraedd nôl i Lanberis erbyn 4:00pm. Mae tocynnau yn £6-£7. Cysylltwch â Gwen Lasarus ar 01286 679465 neu GwenLasarus@gwynedd.gov.uk i archebu lle.
