Oes gennych chi syniad am fusnes neu fenter newydd? 
Drwy gynllun cyffrous Llwyddo yng Ngwynedd mae'n bosib y gallwch dderbyn cymorth er mwyn troi eich syniad yn realiti. Mae'r cynllun newydd hwn yn adeiladu ar lwyddiant y cynllun blaenorol, Llwyddo'n Lleol. 

Er mwyn bod yn gymwys i dderbyn cefnogaeth, bydd rhaid i chi fod yn byw yng Ngwynedd wledig (y Sir i gyd ag eithrio Dinas Bangor), ac mae blaenoriaeth yn cael ei roi i gefnogi: 

• teuluoedd fferm
• pobl ifanc rhwng 20 a 30 oed
• plant o dan 10 oed (drwy ysgolion neu glybiau)
• grwpiau cymunedol
• unigolion tan-gyflogedig (e.e. unigolion diwaith, pobl anabl).

Mae Llwyddo yng Ngwynedd yn cael ei weithredu drwy gyfrwng 4 cynllun: 

1. Mentro: Cyfle i sbarduno mentergarwch ymhlith grwpiau neu unigolion sydd erioed wedi mentro o'r blaen.  Mae'r gefnogaeth yn cynnwys:
   • bwrsariaeth o hyd at £3,000 er mwyn treialu neu gychwyn menter newydd  
   • sesiynau i sbarduno syniadau am fentrau newydd.
2. Galluogi: Cynllun yn cynnig cymorth ymarferol i fusnesau newydd, busnesau bach sydd eisoes yn bodoli ond am fentro i faes newydd, neu grwpiau cymunedol sydd wedi'u lleoli ar fferm. Mae'r gefnogaeth yn cynnwys:
   • cymorth ymarferol i ddatblygu sgiliau a mentora
   • cymorth ariannol hyd at £50,000 (hyd at 50% o gyfanswm gwerth y prosiect)
3. Arloesi: Cynllun yn canolbwyntio ar ddatblygu cynnyrch, gwasanaethau a phrosesau arloesol o fewn meysydd amaeth, arallgyfeirio o amaeth, a'r amgylchedd drwy ddatblygu mentergarwch ymhlith teuluoedd sy'n ffermio a busnesau gwledig. Mae'r gefnogaeth yn cynnwys:
   • cefnogaeth i ddatblygu syniadau a'u troi'n fentrau masnachol
   • grantiau o £11,250 (hyd at 100%, 75% neu 50% o gyfanswm gwerth y prosiect) ar gyfer:
     - ymchwil i'r farchnad ar gyfer cynnyrch a gwasanaethau newydd
     - comisynu gwaith rheoli datblygu technegol a chynllunio busnes manwl.
4. Cynnig Gwynedd: Mae'r dulliau uchod o gefnogi mentrau, galluogi busnes presennol i arallgyfeirio, a datblygu syniadau arloesol yn cael ei ategu gan y prosiect Cynnig Gwynedd. Mae'r cynllun hwn yn canolbwyntio ar gefnogi a hyrwyddo pwynt gwerthu unigryw Gwynedd - sef ansawdd yr amgylchedd a'r cynnyrch lleol.
   Rhoddir cefnogaeth i gynhyrchwyr lleol a chadwyni cyflenwi, a bydd cyfle i gymunedau sydd wedi'u dethol farchnata eu hasedau naturiol a diwylliannol drwy 12 o bwyntiau gwybodaeth technegol, a bydd 'theatr y gwyllt' yn cael eu datblygu o fewn tair ardal.

Am ragor o wybodaeth, neu i drafod eich syniad am fusnes neu fenter newydd, cysylltwch â tim Llwyddo yng Ngwynedd ar LlwyddoyngNgwynedd@gwynedd.gov.uk neu 01286 679774 / 01286 679628

Mae'r cynllun yn cael ei ariannu trwy'r Gynllun Datblygu Gwledig i Gymru 2007-2013 Llywodraeth Cynulliad Cymru.