Nid yw’r darlun o Lloyd George wedi ei arddangos fawr ddim ers i’r arlunydd o Gymro, Vincent Evans ei ddarlunio yn 1936, naw mlynedd cyn marw’r gwleidydd.

Dywedodd Nest Thomas, Swyddog Amgueddfeydd ac Orielau Cyngor Gwynedd:

“Rydym yn falch iawn o allu arddangos y darlun arbennig yma o Lloyd George yn yr Amgueddfa sy’n dwyn ei enw.

"Mae’n fraint gael benthyg y darlun fel y gall trigolion lleol lle magwyd y cyn-Brif Weinidog ac ymwelwyr o du hwnt gael y cyfle i fwynhau’r darlun arbennig yma. Mae’n ddarlun cyfoes a gonest o Lloyd George sydd brin wedi ei weld gan y cyhoedd ers ei beintio yn 1936.

“Rwy’n gobeithio y bydd y darlun unigryw yma yn annog mwy o ymwelwyr i ddod draw i Amgueddfa Lloyd George yn Llanystumdwy lle mae amrywiaeth eang o greiriau difyr a gwybodaeth am un o wladweinwyr mwyaf yr ugeinfed ganrif.”

Mae’r darlun yma o Lloyd George yn dyddio’n ôl i 1936 ac mae ar fenthyg gan D Lloyd George, Abertawe.

Darlun gan Vincent Evans ydyw, gŵr a aned yn Ystalyfera yng Nghwm Tawe. Aeth i weithio i’r pwll glo yn 13 oed, a bu’n löwr am ddeng mlynedd cyn ennill ysgoloriaeth i Goleg Celf Abertawe.

Ynghyd ag Evan Walters ac Archie Rhys Griffiths, roedd yn un o fudiad o arlunwyr o dde Cymru a aeth ati i bortreadu gyda chywirdeb eu cymunedau diwydiannol.

Mae Amgueddfa Lloyd George yn drysorfa o wybodaeth a chreiriau unigryw sy’n portreadu bywyd ac amserau David Lloyd George, gan gynnwys Cornel Ddarganfod a Stori’r Plant lle cewch gyfle i wisgo gwisg Fictorianaidd, chwarae a theganau hen ffasiwn, ysgrifennu ar lechen a darganfod sut brofiad oedd tyfu i fyny yng nghyfnod plentyndod Lloyd George.

Mae’r Amgueddfa ar agor bob dydd trwy fis Medi (10.30am-5pm), ac o ddydd Llun i ddydd Gwener yn ystod mis Hydref (11am-4pm)

Am ragor o wybodaeth am Amgueddfa Lloyd George, cysylltwch â Nest Thomas, Swyddog Amgueddfeydd ac Orielau Cyngor Gwynedd ar 01286 679098.