Prif thema'r gynhadledd oedd urddas mewn gofal. Roedd yn gyfle i bobl hŷn drafod eu pryderon a’u dyheadau ac i glywed am y gwaith sydd eisoes yn digwydd o ran sicrhau bod pobl hŷn yn cael eu trin gydag urddas a pharch.

Ruth Marks, Comisiynydd Pobl Hŷn Cymru, oedd prif siaradwr y gynhadledd. Dywedodd: “Roeddwn yn falch iawn o fod nôl yng Ngwynedd ar gyfer Cynhadledd Pobl Hŷn ym Mhorthmadog.

“Mae llawer o waith da yn cael ei gyflawni sy’n ymwneud â phobl hŷn a’r materion sy’n effeithio arnynt. Roedd hi’n braf iawn cael gwybod bod ffocws clir yn cael ei roi ar urddas mewn gofal, a chlywed sut mae’r Siarter Urddas lleol yn cael ei ddefnyddio mewn gofal preswyl a gofal cartref.

“Mae’n hanfodol gweithio yn agos gyda phobl hŷn a chael gwybod am faterion a gwasanaethau sy’n effeithio ar eu bywydau. Mae’r digwyddiad hwn yn enghraifft o sut i wneud y cysylltiad gorau efo pobl hŷn yn eu cymunedau, a chasglu eu barn a’u profiadau am ddarpariaeth y gwasanaeth.”

Cafodd y gynulleidfa hefyd gyfle i rannu eu profiadau a’u pryderon gyda’r comisiynydd yn ystod sesiwn holi ac ateb.

Uchafbwynt arall y gynhadledd oedd lansio adroddiad ar ganfyddiadau adolygiad diweddar am ddefnydd y Siarter Urddas Mewn Gofal Lleol. Un o ganfyddiadau’r adroddiad oedd bod egwyddor Urddas mewn Gofal yn rhan anhepgor o’r gwasanaethau a ddarperir gan bob un o gartrefi gofal a ymwelwyd â hwy yng Ngwynedd.

Mae’r darganfyddiadau yn dilyn proses o holi defnyddwyr gwasanaethau a gwahanol sefydliadau ynglŷn â gwasanaethau ar gyfer pobl hŷn. Cafodd gwaith ymchwil trylwyr ei wneud ar sut gellir gwella gwasanaethau er budd defnyddwyr a’u gofalwyr a theuluoedd.

Roedd uchafbwyntiau eraill y diwrnod yn cynnwys:

• Gwerfyl Wyn Roberts, Uwch Ddarlithydd ym Mhrifysgol Bangor yn trafod pwysigrwydd yr iaith Gymraeg mewn gofal.
• Dr Christine Dobbs yn trafod gofal diwedd bywyd.
• Canfyddiadau arolwg a gafodd ei gynnal ledled Gwynedd am yr hyn mae pobl yn ei deimlo am urddas a pharch at bobl hŷn.
• Drama fer yn dangos sut y gall gwasanaethau fethu dangos urddas mewn gofal – roedd yn llwyddiannus iawn.

Cafodd y gynulleidfa hefyd y cyfle i siarad gyda chynrychiolwyr o nifer o sefydliadau ac elusennau yn ystod sesiwn gwybodaeth agored.

Dywedodd y Cynghorydd John Wyn Williams, sy’n arwain ar faterion pobl hŷn ar Gyngor Gwynedd: “Roedd y Ganolfan yn fwrlwm o weithgaredd ac roeddem wrth ein boddau o weld cymaint o bobl yno i drafod gwasanaethau ar gyfer pobl hŷn.

“Efallai nad yw rhai pobl yn gwybod beth yw eu hawliau, neu ddim yn gwybod am y sefydliadau sy’n gweithio ar eu rhan. Roedd yn gyfle perffaith iddynt gael gwybod am ddigwyddiadau, gweithgareddau a’r gwasanaethau sydd ar gael, sy’n hyrwyddo annibyniaeth ar gyfer bobl hŷn.”