Cynhelir y cyrsiau undydd ar gyfer y sawl sydd â diddordeb mewn olrhain hanes teulu yn Archifdy Caernarfon dan arweiniad Gwasanaeth Archifdy Cyngor Gwynedd. Bydd y cyrsiau yn rhoi canllawiau ar sut i gychwyn olrhain hanes eich teulu, ac yn rhoi cyfle i edrych ar wahanol fathau o ffynonellau a thystiolaeth.

Bydd sesiwn yn rhoi astudiaeth achos a sesiwn cwestiwn ac ateb yn rhoi cyfle i chwi holi archifyddion Cyngor Gwynedd. Bydd y sawl sy’n mynychu yn derbyn pecyn gwybodaeth. Cost y cwrs yw £10.

Dywedodd y Cynghorydd Roy Owen, sydd â chyfrifoldeb am archifau ar Gyngor Gwynedd:

“Rydym yn gobeithio y bydd y cyrsiau hyn yn gyfle i unrhyw un sydd â diddordeb mewn olrhain hanes eu teulu i weld yr holl gofnodion hanesyddol diddorol sydd ar gael, a bod cyfle arbennig iddynt wneud defnydd o’r cyfleusterau yma yn archifau Cyngor Gwynedd.

“Mae cyrsiau tebyg sydd wedi eu cynnal yn y gorffennol wedi bod yn boblogaidd iawn, ac rydym yn hyderus y bydd nifer o aelodau’r cyhoedd yn awyddus i archebu lle ar y cyrsiau yma hefyd, felly cofiwch i gadw lle os ydych chi’n awyddus i fynychu un o’r cyrsiau. Y cyntaf i’r felin fydd hi.”

Cynhelir y cyrsiau ar y dyddiadau canlynol:

Dydd Sadwrn, 19 Tachwedd 2011: Cwrs Hanes Teulu (Cymraeg)

Lleoliad: Archifdy Caernarfon

Amser: Cwrs diwrnod yn cychwyn am 10am

Dydd Llun, 21 Tachwedd 2011: Cwrs Hanes Teulu (Saesneg)         

Lleoliad: Archifdy Caernarfon

Amser: Cwrs diwrnod yn cychwyn am 10am

Bydd mwy o ddyddiau yn cael eu trefnu yn ardal Meirionnydd yn y flwyddyn newydd.

Mae’n angenrheidiol i archebu lle ar y cyrsiau. Os am archebu lle cysylltwch â:

Gwasanaeth Archifau Cyngor Gwynedd ar 01286 679095/679092  neu e-bostiwch: archifau@gwynedd.gov.uk