Ym mis Gorffennaf 2011, cymeradwyodd y Cyngor gyfres o argymhellion ar gyfer y dalgylch gan gynnwys cynnig i sefydlu ysgol ardal gymuned aml-safle, gydag un safle yn Ysgol Dinas Mawddwy, a’r llall naill ai yn Ysgol Brithdir neu Ysgol Ieuan Gwynedd yn Rhydymain.
Yn dilyn y penderfyniad yma, fe wnaed asesiadau manwl ar safleoedd Ysgol Brithdir ac Ysgol Ieuan Gwynedd i werthuso eu haddasrwydd. Mae’r gwaith hwn wedi dod i’r casgliad mai safle presennol Ysgol Brithdir ynghyd â safle Ysgol Dinas Mawddwy ddylai ffurfio’r ysgol ardal gymuned aml-safle.
Yn unol â’r casgliadau hyn, mae’r adroddiad a fydd yn cael ei ystyried gan Fwrdd Gwynedd ar 11 Hydref yn argymell bod y Cyngor yn symud ymlaen i gyflawni cyfnod o ymgynghori statudol ar y cynnig i gau ysgolion Brithdir, Ieuan Gwynedd, Dinas Mawddwy a Llanfachreth, a sefydlu ysgol ardal gymuned aml-safle i blant o 3 i 11 oed gydag un safle o’r ysgol wedi ei leoli yn safle presennol Ysgol Dinas Mawddwy, a’r llall yn safle presennol Ysgol Brithdir i agor ar 1 Medi 2013.
Os cymeradwyir yr argymhelliad hwn, gofynnir i swyddogion y cyngor gymryd y camau angenrheidiol i ddatblygu safle Ysgol Brithdir a chyflawni gwaith paratoi ymlaen llaw a buddsoddi yn y safle.
Meddai Arweinydd Portffolio Addysg Cyngor Gwynedd, y Cynghorydd Liz Saville Roberts:
“Rydan ni’n ddiolchgar i’r gymuned leol ac yn enwedig i’r ddau gynghorydd lleol, John Pughe Roberts a Gethin Glyn Williams, am y ffordd adeiladol y maen nhw wedi cyfrannu at yr hyn sy’n amlwg yn fater sensitif iawn.
“Fy ngobaith rwan ydi y medrwn ni symud y prosiect ymlaen i ddarparu’r cyfleoedd addysg gorau posibl i bobl ifanc yr ardal am y degawdau i ddod.”
Mae adroddiad Bwrdd y Cyngor yn argymell hefyd y dylid cyflawni gwaith pellach ar ddatblygu’r gymuned ddysgu gydol oes (ysgol) arfaethedig yn nhref Dolgellau. Pan fydd y gwaith hwn wedi ei gwblhau, bydd adroddiad pellach yn cael ei gyflwyno i Fwrdd y Cyngor am benderfyniad terfynol gydag argymhelliad ar y dull gorau o sefydlu’r gymuned ddysgu gydol oes ar gyfer y dref.
Os bydd yn cael ei gymeradwyo, bydd yr argymhelliad i ymgorffori Ysgol Brithdir i’r ysgol ardal gymuned aml-safle a chau Ysgol Ieuan Gwynedd yn destun ymgynghoriad statudol yn yr hydref.
