Mae cynghorwyr Gwynedd wedi pleidleisio i adrefnu addysg yn nalgylch y Berwyn mewn penderfyniad a allai arwain at fuddsoddiad o £10.2 miliwn yn ysgolion y dalgylch.

Mewn cyfarfod o’r Cyngor llawn ar 12 Mai 2011, pleidleisiodd cynghorwyr o blaid sefydlu Campws Dysgu Gydol Oes yn nhref Y Bala i gymryd lle Ysgolion y Berwyn, Beuno Sant a Bro Tegid yn y dref, yn ogystal ag uwchraddio Ysgol O M Edwards a buddsoddi yn Ysgolion Ffridd y Llyn a Bro Tryweryn.

Yn yr un cyfarfod, pleidleisiodd cynghorwyr o blaid cynnig i gau Ysgol y Parc erbyn 31 Awst 2012, gan ddarparu lleoedd i ddisgyblion y Parc yn Ysgol O. M. Edwards, Llanuwchllyn. Ar hyn o bryd mae 19 o ddisgyblion yn mynychu Ysgol y Parc sydd wedi ei leoli tair milltir oddi wrth Ysgol O M Edwards.

Mae’r penderfyniadau hyn yn dilyn cyfnod o drafodaeth fanwl yn y dalgylch ynghyd a’r ymgynghoriad statudol a gynhaliwyd yn ystod mis Ionawr a Chwefror.

Mae Cyngor Gwynedd wedi cyflwyno cais i Lywodraeth y Cynulliad am £7.7 miliwn tuag at gynllun £10.2 miliwn ar gyfer adrefnu ysgolion dalgylch y Berwyn. Mae’r Cyngor yn disgwyl ymateb gan Lywodraeth y Cynulliad yn ystod haf 2011.