Mewn achos yn Llys Ynadon Pwllheli ar ddydd Gwener, 12 Medi, 2008 plediodd Brian Benjamin Farrell o Dremadog, Porthmadog yn euog i un cyhuddiad o fethu hysbysu Cyngor Gwynedd yn brydlon o newid yn ei amgylchiadau er ei fod yn gwybod y byddai yn effeithio ei deilyngdod i Fudd-dal Tai.
Dywedodd Alwyn Jones, a oedd yn erlyn ar ran Cyngor Gwynedd, fod Mr Farrell wedi peidio dweud wrth Uned Budd-daliadau Cyngor Gwynedd fod ganddo gyfalaf sylweddol mewn banc yn Awstralia.
Roedd cyfanswm y gor-daliad o Fudd-dâl Tai a Budd-dâl Treth Cyngor yn £2,556.91.
Dywedwyd hefyd wrth y Llys fod Mr Farrell eisioes wedi talu’r arian yma yn ôl i’r Cyngor.
Wrth ddedfrydu Mr Farrell i ddirwy o £350 dywedodd yr Ynadon eu bod wedi ystyried iddo bledio’n euog yn gynnar, ond yr oeddynt hefyd yn ymwybodol nad oedd angen budd-dal ar Mr Farrell a’i bod yn ymddangos fod y drosedd yn ganlyniad iddo fod yn farus.
Gorchmynwyd iddo hefyd dalu £150 tuag at gostau’r erlyniad a £15 o ordal.
