Mae pecyn ariannol ar gyfer cynllun arloesol gwerth £8.3 miliwn fydd yn ehangu cyfleon gweithgareddau awyr agored yng Ngwynedd, ac yn hwb enfawr i’r economi leol, wedi cael ei sicrhau.

Mae Cynllun Academi Hwylio Genedlaethol Cymru a Chanolfan Ddigwyddiadau Pwllheli wedi derbyn cefnogaeth ariannol gan Gronfa Datblygu Rhanbarthol Ewrop, Llywodraeth Cymru a Chyngor Gwynedd. Mae hyn yn cynnwys tua £4 miliwn o raglen Cydgyfeiriant yr Undeb Ewropeaidd ac o Gronfa Arian Cyfatebol Targed Llywodraeth Cymru. 

Bydd y cynllun yn datblygu canolfan ym Mhwllheli a fydd yn cynnig darpariaeth ar gyfer cystadlaethau hwylio o’r radd flaenaf, yn datblygu’r ardal i fod yn gyrchfan ar gyfer hwylwyr gorau’r byd, yn agor y drws i hwylwyr newydd, yn cynnig cyfleodd i fwy o bobl ddatblygu sgiliau gweithgareddau awyr agored ac yn adnodd i’r gymuned gyfan. Pan fydd yn agor yn 2013, rhagwelir y bydd yr Academi Hwylio'n denu miloedd o ymwelwyr ychwanegol i’r ardal bob blwyddyn.

Mae Cyngor Gwynedd wedi bod yn gweithio mewn partneriaeth gyda Chlwb Hwylio Pwllheli; Llywodraeth Cymru; Chwaraeon Dŵr Gogledd Cymru; Plas Menai; Coleg Llandrillo (Cymru) a Chymdeithas Hwylio Cymru i ddatblygu’r academi a’r ganolfan weithgareddau.

Bydd y ganolfan newydd hefyd yn lle i gynnal gweithgareddau cymunedol ehangach yn y dref - cyfleuster mae galw mawr amdano ym Mhwllheli.

Mae’r cynllun yn ymateb i’r galw sydd am gyfleusterau o safon uwch ym Mhwllheli ac yn ymateb yn uniongyrchol i’r adroddiad Datblygu Cysyniad a baratowyd gan Marina Projects yn 2008. Dros y misoedd nesaf bydd y Tîm Prosiect, mewn ymgynghoriaeth gyda defnyddwyr a’r gymuned, yn datblygu'r cysyniadau hyn ac yn llunio cynlluniau manwl ar gyfer y Cynllun.

Am fwy o wybodaeth gellir cysylltu â'r Adran Economi a Chymuned, Cyngor Gwynedd, Stryd y Jêl, Caernarfon, Gwynedd, LL55 1SH.

Ffôn: 01286 679513

E-bost: adfywio@gwynedd.gov.uk