Cyhoeddwyd rhestr Baneri Glas Cymru mewn seremoni arbennig a gynhaliwyd ar y Promenad yng Nghriccieth ddydd Mercher, 16 Mai.
Ymhlith y traethau a marinas llwyddiannus, a anrydeddwyd gyda’r Faner Las, mae Aberdyfi a Tywyn yn ne Meirionnydd, ymlaen i Abermaw, Criccieth, Pwllheli, Abersoch, Dinas Dinlle a Doc Fictoria Caernarfon.
Mae’r Faner Las yn cael ei chyflwyno bob blwyddyn mewn mwy na 32 o wledydd drwy’r byd. Bellach mae 44 o draethau a 5 marina trwy Gymru wedi ennill yn anrhydedd, nifer sydd yn torri’r record. Mae ennill gwobr y Faner Las yn gydnabyddiaeth o gyrraedd y rheng flaen ymysg traethau a marinas.
Dywedodd Cadeirydd Cyngor Gwynedd, y Cynghorydd Meinir Owen, wrth groesawu’r seremoni yng Nghriccieth:
“Rydym yn falch iawn o allu cyhoeddi’r rhestr o draethau sydd wedi ennill y Faner Las eleni. Mae amryw o lecynnau ledled Gwynedd ymhlith y rhestr, ac rydym yn ddiolchgar iawn ein bod yn gallu ymfalchio yn eu glendid a’r safon cyfleusterau sydd ar gael ynddynt.
“Mae’r ffaith fod 10 o leoliadau wedi ennill yr anrhydedd yma yng Ngwynedd yn dysteb i fuddsoddiad helaeth y Cyngor yn y gwaith o wella traethau ledled y Sir.”
Mae pob traeth yn cael eu beirniadu yn ôl 29 o feini prawf sy’n cynnwys ansawdd dŵr o’r safon uchaf, rheoli sbwriel, darparu gwybodaeth, rheoli cŵn a rheoli amgylcheddol cynaliadwy. Mae’r marinas yn cael eu beirniadu yn unol ag 16 o feini prawf sy’n yn cynnwys cyfleusterau derbyn ar gyfer gwastraff peryglus, cyfarpar achub bywyd digonol ac ymrwymiad i ddiogelu eu hamgylchedd lleol.
Mae’r Baneri Glas yng Nghymru yn cael eu gweinyddu gan Cadwch Gymru’n Daclus, a dyma’r hyn a ddywedodd eu Prif Weithredwr, Tegryn Jones:
“Pan gyflwynwyd y gwobrau yng Nghymru ddechrau’r nawdegau dim ond dau draeth oedd yn cwrdd â’r meini prawf ond eleni rydym yn dathlu’r newydd da bod cymaint â 44 o’n traethau a 5 marina wedi cyrraedd y rhestr. Serch hynny, rydym i gyd yn ymwybodol bod gennym gryn bellter i fynd cyn y gallwn honni bod pob modfedd o’n 750 milltir o draeth yn berffaith lân.
“Cyflawnwyd llawer iawn gan yr Awdurdodau Lleol a Dŵr Cymru yn ystod y blynyddoedd diwethaf o ran gwella ansawdd y dŵr ymdrochi a’r isadeiledd ar y tir. Bellach rydym yn galw ar bawb a ddaw i ymweld â’r traethau i wneud eu rhan drwy sicrhau eu bod yn parchu ein trysorau cenedlaethol."
Traethau a’r Marinas Gwynedd sydd wedi ennill y Faner Las yn 2007: Aberdyfi; Abermaw; Abersoch; Criccieth; Dinas Dinlle (Morfa Dinlle); Doc Fictoria Caernarfon, (Marina); Hafan Pwllheli (Marina); Pwllheli, Marian y De; Tywyn a’r Friog.
