Mae Cyngor Gwynedd yn cefnogi ymgyrch Cynllun Craff am Wastraff a Chymru Gynhaliol i hyrwyddo’r defnydd o gewynnau go iawn yn ystod Wythnos Cewynau go iawn rhwng 11 a 18 Mawrth 2007.

Dywedodd Gwenllian Dafydd, Swyddog Gwastraff ac Ailgylchu Cyngor Gwynedd:

“Mae’r wythnos yma yn gyfle i dynnu sylw at gael gwared ar ddelwedd negyddol cewynnau go iawn. Mae cewynnau go iawn wedi cael eu gweddnewid ac maen nhw’n boblogaidd ymysg rhieni diolch i batrymau ciwt a chŵl, o ddyluniau gwartheg i batrymau’r enfys.  Maen nhw hefyd yn gyfleus i’w defnyddio ac yn hawdd i’w golchi.

“Gall defnyddio cewynnau go iawn yn hytrach na rhai tafladwy arbed faint o wastraff sy’n cael ei anfon i safleoedd tirlenwi bob blwyddyn a helpu rhieni i arbed hyd at £500 a hyd yn oed mwy gydag ail fabi.  Dyma ddim ond dau o’r rhesymau pam ein bod ni am annog mwy o rieni o Wynedd i’w defnyddio.”

Mae’r ymgyrch cewynnau go iawn yng Nghymru yn cynnig gwybodaeth a chyngor diduedd am ddewis a defnyddio cewynnau go iawn drwy ei llinell gyngor ar 0845 4562477.  Ewch i www.realnappies-wales.org.uk am ragor o fanylion ac am wybodaeth am ddigwyddiadau eraill i ddathlu Wythnos Cewynnau Go Iawn.

Dyma’r gweithgaredd diweddaraf yn ymgyrch gyfryngau ddwyieithog ‘ailgylchu dros Gymru/recycle for Wales’ Cynllun “Craff am Wastraff”.  I ddysgu mwy am sut y gallwch chi helpu trwy arbed, ailddefnyddio ac ailgylchu’ch gwastraff, ewch i’r wefan www.craffamwastraff.org.uk